ذكريات الحادث - نسخة الكوز ..

تنويه شديد اللهجه : هذا البوست يحتوي صور دارماتيكيه وغرافيكيه شنيعه .. فعلى أصحاب القلوب الضعيفه عدم القراءة مطلقاً بتاتاً ..

تنويه أقل شدة في اللهجه من التنويه اللي قبله : أضفت صوره حقيقيه لأغراض التوثيق والتوضيح .. فبلاش تقلب القصه شفقه واعيش الدور واقعد اشحد على حالي على بواب الجوامع هون .. ترى أنا طفران ومتعلث خلقه .. 

View Larger Map

بما إني من النوع اللي بغار كثير .. قرقرت أعمل تقليد أعمى للصديق العزيز لونار ..

وأكتب بوست عن ذكريات الحادث تبعي .. واللي للصدفه الغريبه تزامن مع حادث لونار .. واحنا وقتها ما كنا نعرف بعض حتى ..

الزمان: اواسط رمضان 2006

المكان المتحرك: سيارة أخوي

المكان الثابت: قرب مثلث سما الروسان / مستشفى اليرموك (الموضح في الخريطة أعلاه)

كنت من كم شهر متخرج بكالوريوس في الصيف اللي قبله (2006) .. ومسجل ماجستير دغري عالفصل الاول (2006/2007) .. وبشتغل في مدرسه شبه ثانوية مدرس كيميا وعلوم على الإضافي في قرية من قرى "العبيدات" اسمها "يبلا" ..

وبحكم سكني في قرية ملكا .. كنت أطلع الصبح من البيت .. انزل على نقطة التقاء الطريق بين القريتين - مثلث سما الروسان - واركب باص "يبلا" عشان اروح على مكان دوامي ..

احياناً كنت أطلع بباص الخط تبع ملكا .. وأحياناً كنت أطلع مع اخوي .. ينزلني على المثلث وأكمل أنا من هناك ..

في هذاك اليوم .. طلعت مع اخوي .. على الطريق حسيت إني ممكن اتأخر شوية دقايق .. واللي معناه أضيع موعد مرور باص يبلا .. وأتأخر على دوامي أقل إشي نص ساعه .. فحزمت أمري إني اقعد "أهوي" لأخوي عشان يزررر (يسرع) شوي لحتى ألحق ..

المهم .. اشتغل بالمصخمط أخوي .. على "مالك يا زمه ما بتسرع شوي؟ .. هيَّك شوفير ما شا الله" .. و "لد لد تشيف هظاك سبقك .. يا حيف بس" .. أخوي ظل صامد لآخر لحظه .. بس ع مين .. الكوز "مُهَوي" من الدرجه الاولى .. 

قربنا نوصل مثلث سما .. وماشيين في شارع بدون جزيره وسطيه .. وعلى آخر الشارع بتبدى الجزيره تمهيداً للإشارة الضوئيه ..

المهم .. اخوي شد وقاعد بتجاوز عن باص هونداي زغير (الباص كان مآخذ اليمين ومعطي مجال لأخوي يتجاوز) .. لما صرنا على سواه بلش الباص يلز علينا وياخذ شمال .. وأخوي يبعد عنه للشمال عشان ما يصدم فيه .. فجأه ما حسينا إلا وإحنا ضاربين في أول الجزيرة الوسطيه ..

أخوي ما كان منتبه (بالمختصر باص الهونداي لبسنا للجزيره وشرد) .. سرعتنا تقريبا 80 كم/الساعه .. ولأنه السيارة ثقيله .. طلعت ببطنها على الجزيره .. نطت لفوق شوي ونزلت .. ومع النزله اتكسر القزاز الأمامي .. اخوي لابس حزام الامان (مثال للشوفير الحويط) .. ومحسوبكم زي الشوال .. مش لابس الحزام .. اخوي الحمدلله ما صار في اشي .. بس تبين لاحقاً إنه ضرب صدره في الستيرينج .. وظلت الكدمه توجعه كم اسبوع بعدها ..

نجي لحالة العضو الماثل أمام عدالتكم .. كوني (وكما سبق الذكر زي الشوال) مش لابس حزامي .. طرت مع حركة السيارة .. وخبط وجهي (المساحه ما بين العين والحاجب) ببقايا القزاز المكسر اللي ظل طالع من قاعدة القزاز الامامي في السيارة .. مع حركة (سلااااش) دراماتيكيه سريعة من اليسار لليمين .. (مكان الاصابات موضح بالخطوط الحمرا في الشكل المجاور.. وحركة السلاش موضحه بالاسهم الخضراء .. وما تدقوش على موضوع الشعر اللي في الرسم .. ماشي!!!) ..

الاسد (اللي هو أنا) صاحي ما غيب .. أخوي طلع يردح للباص اللي شرد .. وأنا نهضت حالي شوي أطلع على وجهي بالمراية .. الحمد لله ما شفت الا الاشياء اللي فوق جبيني .. اللي تحت ما لحقت أشوفه .. بس حسيت إنه في إشي غلط .. كنت عم بشوف بعيني اليمين .. بس الرمش نازل .. وارفع وأنزل .. والاخ خارج التغطيه ..

المهم رجع أخوي فتح الباب وطلعني من السيارة وأنا منزّل راسي لتحت .. وعلى اعتبار إنه ماسورة الدم انفتحت .. اعطاني فاين وقلي اكبس على وجهك .. الناس وقفت بدها تساعد .. فأخوي اخذني بده يركبني بسيارة مرسيدس (بطه) (وتسألونيش كيف عرفت نوع السيارة) وياخذني على المستشفى اللي جنبنا .. أنا قلت شبحنا بالمرسيدس يا معلم .. بس أخوي - والله العليم - إنه لما شافني رسمياً انعجق .. بعد ما صرت حاطط رجلي بالسيارة قلي تعال بلاش نوسخ السيارة للزلمه .. "وك شووووو؟؟!" .. المهم .. سحبني واتسلقنا على قلاب!!!   ..

لحد هسا أنا ما كنت خايف .. ما بعرف .. مش مستوعب الموضوع والا إنه إشي جديد .. المهم وانا في القلاب .. وحاطط ايدي على وجهي .. تكونت بقدرة قادر .. بركه زغنوطه من الدم بين رجلي .. هون أنا خف عقلي .. صرت اقرأ قرآن بصوت عالي .. واحكي .. "انا عارف ليش صار فيه هيك .. هاي ضربه .. بده ربنا يصحيني فيها .. ويرجعني للطريق" .. واخوي يهدي علي ويسكت فيه .. لحد ما وصلنا الطوارئ ..هو على الطريق حكا تلفون مع اخوي الثاني وقله إنه صار معنا حادث ..

اتشعبطت عن القلاب نزولاً .. ودخلت الطوارئ .. سحبني أخوي ومددني على فرشة العمليات .. وبلش يخيط بوجهي (أخوي دكتور أسنان .. بس الاخ بعرف بكلشي ما شاء الله ) .. ما صبرش على الدكتور المناوب .. كونه كان نايم .. هو بلش يخيط وانا حاسس بالعملية بتم في وجهي .. وبنفس الوقت مش حاسس بوجع .. يعني وجهي لسا مخدر من الضربه ..

بعد شوي روقت .. وبلشت اتزانخ .. على "هاه شو الاخبار عندك فوق؟ مطول؟ ازهقت!" .. ولما وصل لطرف وجهي بقله . "ايش يا باشا .. كإنو وجهي خريطه؟ " ... بعد شوي وصل أخوي الثاني .. فقلت بحالي خلنا نتسلى بالثاني .. خلي الاولاني يعرف يشتغل .. فبقله "كونه وجهي صار خريطه هسا .. بدكو تدورولي على عروس تقبل فيه عالسريع .. يعني لا شعر ولا وجه ولا سخام .. خلص خربت عالخالص يا باشا" .. بعدين اعطيته تلفوني وقلتله يتصل بواحد من الشباب بالمدرسه يخبرهم إنه أنا وضعي ما بسمح اداوم اليوم ..

المهم .. كمل أخوي تفصيل فصطان العرس اللي كان بعمله بوجهي .. ولزقني بشاش وما بعرف شو (يعني رسمياً قلبت فصطان عرس)   .. وقعدوني على كرسي بعجلات  .. وقرب علي اخوي بقلي .. "الشرطي هون عشان توقع عن تنازل .. لأنهم سجلوا الحادث تدهور .. واذا ما وقعت رح يحطوني بالسجن" .. اطلعت عليه من تحت الشاش بنظره خبيثه وقلتله .. "كم تدفع عشان أوقع؟"  .. المهم رحت وقعت وطلعوني على غرفه في المستشفى .. كان فيها تختين .. بس كنت لحالي ..

وصلت الحجه والحجي على غرفتي .. وبتعرفوا الامهات .. منيح مش منيح .. بدها تعيط .. وانا اهدي عليها .. وبلاش تعيطي يمه .. أني مليح .. وما فييش إشي .. آخر إشي فقعت معي .. فقلبتها مزح .. إنه بدنا نضحك الحجه ..

قربت عليها بقللها .. "يمه اتشوفيلنا عروس .. والا راحت عليّ فكرك؟" 

ومن هناك اتحلحلت الامور شوي .. أخوي الكبير قرب علي بوشوشني "بدك إشي؟" .. قلتله "دخيل على البسس .. شوفلي بوكيت فايسروي حششت معي؟" .. (بس للعلم كنت صرت ماخذ أبرة مضاد حيوي بالوريد ومفطر وراح رمضان في الباي باي) ..  بعد شوي جابلي الدخان .. وعصير .. وروحو الجماعه .. وانا ظليت في غرفتي .. أدخن على الشباك وآخر حلاوه وضعي ..

تبين إنه الاصابه قريبه من عيني اليمين لحد انها مزعت جفني من نصه بالعرض .. فبعد يومين نزلوني على عيادة العيون فحصوا عيوني بس ما كان في اشي الحمد لله ..

وأحصيت عدد القطب في وجهي .. طلعوا 50 قطبه من الموديل الزغير (التجميلي) ..

نمت بالمستشفى ليلتين .. عشان كانوا إمشينني على مضاد حيوي بالوريد ..

وروحت بعدها .. عالبيت .. بباص هونداي ..

طبعاً لأغراض التوثيق .. وللحظة مثل هاي .. لما روحت عالبيت صورت حالي (يمين - بعد ثلاث أيام من الحادث) .. 

وبقيت هوية باص الهونداي المتسبب بهذه الفجيعه النكراء مجهولة حتى هذه اللحظه ..