عن التعليم في الاردن .. رد على الاخت نيسان ..

الاخت نيسان طرحت موضوع مهم عن التعليم في الاردن .. كان إلي نصيب أعيش جزء من واقعه لمدة اربع سنوات .. حبيت اشارك بوجهة نظري الشخصيه .. بشكل منفصل .. لزيادة الفائدة

__________________

يا ستي .. ولا يهونوا السامعين يعني ... انا كنت شخص مشارك لأربع سنين في العمليه التعليميه في الاردن .. ومش من زمان .. كانت طالب تحت وطأت العمليه التعليميه ذاتي .. الفرق شاسع .. ما بين 15 سنه .. وهسا .. والهوه اكثر اتساعاً كلما رجعنا لورا .. يا ستي .. وجهتي نظري الشخصيه وخصوصاً في المدارس الحكومية كالتالي ..

1- الوضع المالي والظروف الوظيفيه السيئة للمعلم خلت كمية كبيره من الكفاءات تهجر مهنة التعليم .. وما ظل من هظول كثير .. معظم اللي على رأس عملهم .. مش كفاءات .. ولا يصح انهم يتحملوا مسؤولية تنشأة جيل المستقبل ..

2- كلامك صحيح فيما يخص تسييس المناهج وتهويد اتجاهاتها .. بس لسا في اشي ألعن .. الطالب الاردني صار فأر تجارب .. كل ما طلع براس خبير سولافه .. بقوموا برظوا وراه .. ويا حبيبي اذا كان خبير اجنبي .. ما بنخلص من التطبيل والتزمير .. واللي بعدهم مش مستوعبينوه .. انه ما في حدا بدور على مصلحتنا ..

3- البيروقراطية الغبية .. في معاملاتنا .. وفي دوائرنا .. واللي منهم المدارس ومديريات التربية ووزارتها .. والأساليب اللي عفا عليها الزمان .. بتعيق بشدة .. تطور التعليم لمستوى يجاري اللي صاير في العالم ..

4- نوعية الطالب (أو الطفل) في العصر الحالي تختلف تماماً عن ما كانت موجوده عليه قبل 10 سنين واسحبي لورا .. بمعنى .. الجيل الحالي .. بميل للخمول .. واستعمال التكنولوجيا المتوفره حتى حدها الاقصى .. ونتج عن هاي التكنولوجيا تفتح اكبر بكثير في الادراك العام .. فاق حتى ادراك الاهالي والمعلمين انفسهم .. بمعنى انه المعلم .. والاب أو الام بطل عندهم القدره على مجاراة الطفل في تفكيره وثقافته .. والمشكله انه الادراك هاظ مش من ناحية ايجابية .. لأنه زي ما كلنا بنعرف .. الاعلام ووسائل التعلم المفروضه علينا في بيوتنا من انترنت وتلفزيون ومجلات وخلافه .. بتنشر الثقافه الغربية الـ(perfect) وبتترك اللي بعرفوه جيل الاباء والمعلمين من ثقافتنا الشرقيه .. وبالنتيجه .. صارت نظرة الطالب للمناهج .. وادراك الكبار .. نظرة استخفافية .. وزيارة المدرسة بطلت اكثر من تغيير جو .. وملاقاة الاصحاب .. وبآخر السنه النجاح بأي شكل من الاشكال .. انا ما بقول انه الاجيال السابقة كانت خرافية .. لأ .. بس الاشي اللي كان شاذ عن الطبيعي في هظاك العصر .. صار هو الطبيعي في هاظ العصر ...

5- المستوى التعليمي في كل العالم بينحدر مع الوقت .. بس في فرق زغير في العالم الغربي .. انه دايماً في مساحة للمتميزين واصحاب الابداع والفكر .. واللي عنا بنجرفوا مع التيار وبتاكلهم العملية التربوية الفاشله ..